ഹോർമുസ് കടലിടുക്കിൽ യഥാർത്ഥത്തിൽ ആർക്കാണ് ആധിപത്യം?

ലോകത്തെ ഏറ്റവും പ്രധാനപ്പെട്ട എണ്ണ ഗതാഗത പാതയായ ഹോർമുസ് കടലിടുക്കിന്റെ നിയന്ത്രണത്തെച്ചൊല്ലി അമേരിക്കയും ഇറാനും തമ്മിലുള്ള തർക്കം രൂക്ഷമായി തുടരുകയാണ്. കടലിടുക്കിന്റെ പൂർണ്ണ നിയന്ത്രണം തങ്ങൾക്കാണെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് അവകാശപ്പെടുമ്പോൾ, ഇറാന്റെ അനുമതിയില്ലാതെ ഒരു കപ്പലും കടന്നുപോകാൻ അനുവദിക്കില്ലെന്ന നിലപാടിലാണ് ടെഹ്റാൻ. എന്നാൽ, മേഖലയിലൂടെ കടന്നുപോകുന്ന കപ്പലുകളുടെ റൂട്ട് സംബന്ധിച്ച യഥാർത്ഥ വിവരങ്ങൾ പരിശോധിക്കുമ്പോൾ വേറിട്ടൊരു ചിത്രമാണ് വ്യക്തമാകുന്നത്.

മാരിറ്റൈം ഇന്റലിജൻസ് സ്ഥാപനമായ 'ക്പ്ലർ' (Kpler) നൽകുന്ന വിവരങ്ങളെ ഉദ്ധരിച്ച് അൽജസീറയാണ് ഇതുസംബന്ധിച്ച കണക്കുകൾ പുറത്തുവിട്ടത്.

രണ്ടായി പിളർന്ന നാവിക പാത

യുദ്ധത്തിന് മുൻപ് ഒറ്റപ്പാതയായിരുന്ന ഹോർമുസ് ഇപ്പോൾ രണ്ട് പ്രധാന റൂട്ടുകളായി മാറിയിരിക്കുന്നു.

ഇറാനിയൻ റൂട്ട്: ലറക്, ഖെഷം ദ്വീപുകൾക്ക് സമീപത്തുകൂടി ഇറാന്റെ തീരത്തോട് ചേർന്നുപോകുന്ന വടക്കൻ പാത. ഇറാൻ നിർദേശിക്കുന്നത് ഈ പാതയാണ്.

ഒമാനി റൂട്ട്: ഒമാൻ തീരത്തോട് ചേർന്ന്, അമേരിക്കൻ നാവികസേനയുടെ സംരക്ഷണത്തിൽ പ്രവർത്തിക്കുന്ന തെക്കൻ പാത. ഇതിനാണ് വാഷിംഗ്ടൺ ഊന്നൽ നൽകുന്നത്.

കണക്കുകൾ പറയുന്നത് എന്ത്?

ആഗസ്ത് 1 മുതൽ 19 വരെയുള്ള ദിവസങ്ങളിൽ 236 കപ്പലുകളാണ് ഹോർമുസ് കടലിടുക്കിലൂടെ കടന്നുപോയത്. ഇതിൽ എണ്ണ, എൽ.പി.ജി, എൽ.എൻ.ജി എന്നിവ കൊണ്ടുപോകുന്ന 112 ടാങ്കറുകളും ഉൾപ്പെടുന്നു.

ഇറാനിയൻ പാത: ആകെ കടന്നുപോയ കപ്പലുകളിൽ 35 ശതമാനവും (83 കപ്പലുകൾ) ഇറാന്റെ പാത പരസ്യമായി ഉപയോഗിച്ചു. ഇതിൽ 21 എണ്ണം എണ്ണ/വാതക ടാങ്കറുകളാണ്.

ഒമാനി പാത: വെറും 3 കപ്പലുകൾ മാത്രമാണ് അമേരിക്ക നിർദ്ദേശിച്ച ഒമാനി പാത പരസ്യമായി ഉപയോഗിച്ചത് (ഇതിൽ എണ്ണ ടാങ്കറുകൾ 2 എണ്ണം മാത്രം).

അജ്ഞാത റൂട്ടുകൾ (Dark Routes): കടന്നുപോയതിൽ 60 ശതമാനത്തിലേറെ കപ്പലുകളും (148 എണ്ണം) തങ്ങളുടെ ലൊക്കേഷൻ കാട്ടുന്ന എ.ഐ.എസ് (AIS) ട്രാക്കിംഗ് സിസ്റ്റം ഓഫ് ചെയ്താണ് യാത്ര ചെയ്തത്. എണ്ണ ടാങ്കറുകളിൽ 80 ശതമാനവും (89 എണ്ണം) ഈ രീതിയാണ് സ്വീകരിച്ചത്.

എന്തുകൊണ്ട് കപ്പലുകൾ ട്രാക്കിംഗ് ഓഫ് ചെയ്യുന്നു?

അമേരിക്കയുടെയും ഇറാന്റെയും സൈനിക ആക്രമണങ്ങളും മിസൈൽ ഭീഷണികളും ഭയന്നാണ് ഭൂരിഭാഗം കപ്പലുകളും ഡിജിറ്റൽ അടയാളങ്ങൾ മറച്ചുവെച്ച് യാത്ര ചെയ്യുന്നത്. ആഗസ്ത് മാസത്തിൽ ഇരുപക്ഷവും വിവിധ കപ്പലുകൾക്ക് നേരെ ആക്രമണം നടത്തിയിട്ടുണ്ട്.

കൂടാതെ, ഉപരോധങ്ങൾ മറികടക്കാനും നടുക്കടലിൽ വെച്ച് മറ്റു കപ്പലുകളിലേക്ക് ചരക്ക് മാറ്റാനും (Ship-to-ship transfers) ഇത്തരം രഹസ്യ യാത്രകൾ ഉപയോഗിക്കുന്നുണ്ടെന്ന് നിരീക്ഷകർ ചൂണ്ടിക്കാണിക്കുന്നു.

ആരെയാണ് കപ്പലുകൾക്ക് കൂടുതൽ ഭയം?

ശക്തമായ നാവിക ഉപരോധവും ട്രംപിന്റെ കടുത്ത മുന്നറിയിപ്പുകളും നിലനിൽക്കെത്തന്നെ, അഞ്ചിലൊന്ന് എണ്ണ ടാങ്കറുകളും ഇറാന്റെ പാത തിരഞ്ഞെടുക്കാൻ ധൈര്യം കാണിച്ചു. എന്നാൽ അമേരിക്കൻ പാത ഉപയോഗിക്കാൻ ഭൂരിഭാഗം പേരും തയ്യാറായില്ല.

ഡൊണാൾഡ് ട്രംപിന്റെ ഭീഷണികളേക്കാൾ ഉപരിയായി ഇറാനെ ഭയപ്പെടുന്നു എന്നതിന്റെ വ്യക്തമായ തെളിവാണ് ഈ കണക്കുകളെന്ന് റിപ്പോർട്ട് വിലയിരുത്തുന്നു. തന്ത്രപ്രധാനമായ ഈ പാതയിൽ ഇറാന്റെ സ്വാധീനം ഇപ്പോഴും ശക്തമായി തുടരുന്നു എന്ന് തന്നെയാണ് ലഭ്യമായ വിവരങ്ങൾ അടിവരയിടുന്നത്.

(അൽജസീറ റിപ്പോർട്ടിനെ അവലംബിച്ച് തയ്യാറാക്കിയത്)

#IranUSconflict #StraitofHormuz #Middleeast