ഹജ്ജ് ഇൻസ്‌പെക്ടർ തസ്തികയിലേക്ക് ഇപ്പോൾ അപേക്ഷിക്കാം

 

മുംബൈ: 2027-ലെ ഹജ്ജ് തീർത്ഥാടനത്തിന് മുന്നോടിയായി, തീർത്ഥാടകരെ സഹായിക്കുന്നതിനും ക്ഷേമപ്രവർത്തനങ്ങൾ ഏകോപിപ്പിക്കുന്നതിനുമായി 'സ്‌റ്റേറ്റ് ഹജ്ജ് ഇൻസ്‌പെക്ടർ' (SHI) തസ്തികയിലേക്ക് കേന്ദ്ര ഹജ്ജ് കമ്മിറ്റി അപേക്ഷ ക്ഷണിച്ചു. കേന്ദ്ര-സംസ്ഥാന സർക്കാറുകളിലെയും കേന്ദ്രഭരണ പ്രദേശങ്ങളിലെയും സ്ഥിരം ജീവനക്കാരിൽ നിന്നാണ് ഹ്രസ്വകാല ഡെപ്യൂട്ടേഷൻ വ്യവസ്ഥയിൽ അപേക്ഷ ക്ഷണിച്ചിട്ടുള്ളത്.

​സൗദി അറേബ്യയിലെ ജിദ്ദയിലുള്ള ഇന്ത്യൻ കോൺസുലേറ്റ് ജനറലിന്റെ (CGI) കീഴിലായിരിക്കും ഇവർ പ്രവർത്തിക്കുക. 135 തീർത്ഥാടകർക്ക് ഒരു ഇൻസ്‌പെക്ടർ എന്ന അനുപാതത്തിലാണ് നിയമനം. ഇതുപ്രകാരം ഏകദേശം 908 ഇൻസ്‌പെക്ടർമാരെയാണ് തിരഞ്ഞെടുക്കുക. 

​പ്രധാന തീയതികൾ 

​ഓൺലൈൻ അപേക്ഷ ആരംഭിക്കുന്നത്: 2026 ആഗസ്ത് 13

​അപേക്ഷിക്കാനുള്ള അവസാന തീയതി: 2026 ആഗസ്ത് 27

​കമ്പ്യൂട്ടർ അധിഷ്ഠിത പരീക്ഷ (CBT): 2026 സെപ്റ്റംബർ 06

​ഇന്റർവ്യൂ & മെഡിക്കൽ ഫിറ്റ്‌നസ് ടെസ്റ്റ്: 2026 സെപ്റ്റംബർ 08 മുതൽ 16 വരെ

​രണ്ട് ദിവസത്തെ പരിശീലനം (മുംബൈയിൽ): 2026 ഒക്ടോബർ രണ്ടാം വാരം

​ഡെപ്യൂട്ടേഷൻ കാലാവധി: 2027 ഏപ്രിൽ 03 മുതൽ ജൂൺ 25 വരെ (ഏകദേശം രണ്ടു മാസം)

​യോഗ്യതാ മാനദണ്ഡങ്ങൾ

​മതം: മുസ്‌ലിം വിഭാഗത്തിൽപ്പെട്ടവർക്ക് മാത്രമാണ് അപേക്ഷിക്കാൻ അർഹത.

​ഉദ്യോഗം: കേന്ദ്ര/സംസ്ഥാന സർക്കാറുകൾ, കേന്ദ്ര സായുധ പോലീസ്‌ സേന (CAPF)/പാര മിലിട്ടറി, പൊതുമേഖലാ സ്ഥാപനങ്ങൾ (PSU), സ്വയംഭരണ സ്ഥാപനങ്ങൾ എന്നിവയിലെ സ്ഥിരം ജീവനക്കാരായിരിക്കണം.

(ശ്രദ്ധിക്കുക: 7th CPC അനുസരിച്ച് ലെവൽ-10 അല്ലെങ്കിൽ അതിനുമുകളിലുള്ള ഗ്രൂപ്പ്-എ / ക്ലാസ്-1 തസ്തികയിലുള്ള ഉദ്യോഗസ്ഥർ അപേക്ഷിക്കാൻ അർഹരല്ല).

​വിദ്യാഭ്യാസ യോഗ്യത: അംഗീകൃത സർവകലാശാലയിൽ നിന്നുള്ള ബിരുദം.

​പ്രായപരിധി: അപേക്ഷിക്കുന്ന തീയതിയിൽ 50 വയസ്സിൽ താഴെയായിരിക്കണം.

​പാസ്‌പോർട്ട്: കുറഞ്ഞത് 31.12.2027 വരെ കാലാവധിയുള്ള ഇന്ത്യൻ അന്താരാഷ്ട്ര പാസ്‌പോർട്ട് ഉണ്ടായിരിക്കണം.

​ഭാഷാ പരിജ്ഞാനം: ഇംഗ്ലീഷ്, ഉറുദു, ഹിന്ദി, അല്ലെങ്കിൽ പ്രാദേശിക ഭാഷ എന്നിവയിൽ പ്രാവീണ്യം വേണം. അറബിക് ഭാഷ അറിയാവുന്നവർക്ക് മുൻഗണന നൽകും.

മറ്റു യോഗ്യതകൾ 

കമ്പ്യൂട്ടർ സാക്ഷരത, ശാരീരിക-മാനസിക ഫിറ്റ്‌നസ്, 'ഹജ്ജ് സുവിധ' (Haj Suvidha) ആപ്പിൽ പരിജ്ഞാനം, ഹജ്ജ് ചടങ്ങുകളെക്കുറിച്ചും ലോജിസ്റ്റിക്‌സിനെക്കുറിച്ചും വ്യക്തമായ അറിവ് എന്നിവ നിർബന്ധമാണ്.

​അനർഹത: മുമ്പ് മൂന്നോ അതിലധികം തവണയോ SHI/ ഖാദിമുൽ ഹുജ്ജാജ് ആയി സേവനമനുഷ്ഠിച്ചവർക്ക് അപേക്ഷിക്കാനാകില്ല. മുൻ ഡെപ്യൂട്ടേഷൻ കാലയളവിൽ മോശം പെരുമാറ്റ റിപ്പോർട്ട് ലഭിച്ചവരും അർഹരല്ല.

​സംവരണം 

​50% ജനറൽ വിഭാഗത്തിന് (എല്ലാ യോഗ്യരായ അപേക്ഷകർക്കും).

​25% കഴിഞ്ഞ 5 ഹജ്ജ് സീസണുകളിൽ മികച്ച പ്രകടനം കാഴ്ചവെച്ച അനുഭവസ്ഥർക്ക്.

​20% കഴിഞ്ഞ 5 വർഷത്തിനിടെ ഹജ്ജ് നിർവഹിച്ചവർക്ക്.

​5% സംസ്ഥാന/ കേന്ദ്രഭരണ പ്രദേശ ഹജ്ജ് കമ്മിറ്റികളിലെയും വഖഫ് ബോർഡുകളിലെയും സ്ഥിരം ജീവനക്കാർക്ക്.

​പുരുഷ തുണയില്ലാതെ (LWM Category) വരുന്ന വനിതാ തീർത്ഥാടകരെ സഹായിക്കാൻ ആവശ്യാനുസരണം വനിതാ ഇൻസ്‌പെക്ടർമാർക്കായി സീറ്റുകൾ സംവരണം ചെയ്യും.

​തിരഞ്ഞെടുപ്പ് രീതിയും പ്രതിഫലവും

​കമ്പ്യൂട്ടർ അധിഷ്ഠിത പരീക്ഷ (CBT - 170 മാർക്ക്), ഇന്റർവ്യൂ (30 മാർക്ക്) എന്നിവയിലെ ആകെ മാർക്കിന്റെ അടിസ്ഥാനത്തിലാണ് മെറിറ്റ് പട്ടിക തയ്യാറാക്കുന്നത്. രണ്ടിലും കുറഞ്ഞത് 50% മാർക്ക് വീതം വേണം.

​തുടര്‍ന്ന് മെഡിക്കൽ ഫിറ്റ്‌നസ് പരിശോധനയുമുണ്ടാകും.

​നിയോഗിക്കപ്പെടുന്നവർക്ക് സ്വന്തം മാതൃവകുപ്പിൽ നിന്നുള്ള ശമ്പളവും അലവൻസുകളും തുടർന്നും ലഭിക്കും.

​സൗദി അറേബ്യയിലെ യാത്ര, താമസം എന്നിവയ്ക്ക് പുറമെ SAR 3100 (സൗദി റിയാൽ) നിശ്ചിത അലവൻസായി നൽകും. ഇതിന്റെ 50% ചെലവ് ഹജ്ജ് കമ്മിറ്റി ഓഫ് ഇന്ത്യയും ബാക്കി 50% അതത് സംസ്ഥാന ഹജ്ജ് കമ്മിറ്റികളും വഹിക്കും.

​അപേക്ഷിക്കേണ്ട വിധം

​താൽപ്പര്യമുള്ള ഉദ്യോഗസ്ഥർക്ക് ഹജ്ജ് കമ്മിറ്റിയുടെ ഔദ്യോഗിക വെബ്‌സൈറ്റായ hajcommittee.gov.in വഴി ഓൺലൈനായി അപേക്ഷിക്കാം. തൊഴിലുടമയിൽ നിന്നുള്ള നോ ഒബ്ജക്ഷൻ സർട്ടിഫിക്കറ്റ് (NOC) അപേക്ഷയോടൊപ്പം സമർപ്പിക്കേണ്ടതാണ്. ഓഫ്‌ലൈൻ അപേക്ഷകൾ സ്വീകരിക്കുന്നതല്ല.

#Hajj2027 #Hajjcommittee #SHIApplication